Main Menu

امریکا میں کورونا وائرس کے سب سے زیادہ متاثرین،تعداد 1 لاکھ 53 ہزارسے بڑھ گئی

واشنگٹن: دنیا بھر میں کورونا وائرس وبا کی تباہ کاریاں جاری ہیں اور اس سے ہونے والی اموات 36 ہزار 873 ہوچکی ہیں جب کہ 7 لاکھ 66 ہزار 336 افراد متاثرین ہوچکے ہیں۔

اعداد و شمار کے مطابق کورونا وائرس سے متاثر ہونے والے 1 لاکھ 60 ہزار افراد صحت یاب ہوچکے ہیں تاہم امریکا اور یورپ سمیت دنیا کے دیگر ممالک میں اس کا پھیلاؤ تیزی سے جاری ہے۔

کورونا وائرس کے متاثرین کی تعداد کے اعتبار سے امریکا پہلے نمبر پر آچکا ہے۔ مریضوں کی مجموعی تعداد 1 لاکھ 53 ہزار سے تجاوز کرچکی ہے اور مرنے والوں کی تعداد 2 ہزار 828 ہوگئی ہے۔ امریکا میں صحت عامہ کے سینیئر ترین حکومتی مشیر نے خدشہ ظاہر کیا ہے کہ امریکا میں کورونا وائرس سے 1 سے دو لاکھ افراد موت واقع ہوسکتی ہے۔ صدر ٹرمپ نے لاک ڈاون میں تیس اپریل تک توسیع کردی ہے اور سنٹرل پارک میں 70 بستروں پر مشتمل عارضی ہسپتال بنانے کا فیصلہ کیا گیا ہے۔

غیر ملکی خبر رساں ادارے کے مطابق امریکی حکام نے امریکا کی جیلوں میں کورونا وائرس کے تیزی سے پھیلاؤ کا خدشہ ظاہر کیا ہے۔ 22 مارچ تک 20 بڑے امریکی جیلوں میں کورونا وائرس سے 226 قیدیوں کے متاثر ہونے کی تصدیق ہوچکی ہے۔ دوسری جانب امریکی ریاست نیو جرسی میں قانون نافذ کرنے والے اداروں کے 288 اہلکاروں میں کووڈ 19 کی تصدیق ہوئی ہے۔

امریکی نشریاتی ادارے کے مطابق ڈزنی لینڈ سمیٹ امریکا کے متعداد سپر اسٹورز اور کمپنیوں نے تنخواہوں اور ملازمتوں میں عارضی اور مستقبل بنیادوں پر کٹوتی کا سلسلہ شروع کردیا ہے۔

کورونا وبا سے شدید متاثر ہونے والے یورپی ملک اٹلی میں بھی ہلاکتوں کا سلسلہ جاری ہے اور گزشتہ 24 گھنٹوں میں وہاں کورونا وائرس سے متاثرہ مزید 812افراد لقمہ اجل بن چکے ہیں جس کے بعد مجموعی اموات 36ہزار 873 اور متاثرین کی تعداد 1لاکھ ایک ہزار سے تجاوز کرگئی ہے۔ تاہم اٹلی میں مسلسل تیسرے روز نئے مریضوں کی شرح میں کمی واقع ہوئی ہے۔

اسپین میں پچاسی ہزارسے زائد افراد وائرس میں مبتلا ہیں اور وبا سے ہونے والی اموات 7ہزار 340 ہوچکی ہیں۔ اسی طرح جرمنی میں کورونا کے مریضوں کی تعداد 63 ہزار سے تجاوز کرگئی ہے اور اب تک 560 اموات کی تصدیق ہوچکی ہے۔ فرانس میں 44ہزار 550 کیسز کی تصدیق ہوچکی ہے اور ایک دن کے دوران 418ہلاکتوں کے بعد مجموعی اموات 3ہزار سے زائد ہوگئی ہیں۔

برطانیہ میں کورونا وائرس کے مریضوں کی تعداد 22 ہزار 448 ہوچکی ہے اور ہلاکتیں 14سو سے تجاوز کرگئی ہیں۔ تاہم حکومتی مشیر پروفیسر نیل فرگوسن نے وائرس کے پھیلاو میں کمی کی خوش خبری سنا دی ہے۔ ان کے مطابق لاک ڈاؤن کے مثبت اثرات نظر آنا شروع ہو گئے ہیں۔ وائرس میں مبتلا شہزادہ چارلز صحتیاب ہوگئے ہیں اور انہوں نےایک ہفتےسے اختیار کی گئی تنہائی بھی ختم کردی۔

ایران میں گزشتہ 24 گھنٹوں کے دوران 117 اموات کے بعد مجموعی تعداد27 سو اور متاثرین کی تعداد 41ہزار سے زائد ہوچکی ہے۔

چین میں ایک دن کے دوران کورونا وائرس سے 4 ہلاکتیں ہوئی ہیں اور 34 نئے کیس رپورٹ ہوئے ہیں۔ مجموعی طور پر چین میں وبا پر قابو پالیا گیا ہے۔






Related News

Comments are Closed