پاکستان آج وارم اپ میچ میں سری لنکا سے ٹکرائے گا

کولکتہ: پاکستان اور سری لنکا کے درمیان ٹی ٹوئنٹی ورلڈ کپ میچز سے قبل وارم اپ میچ میں آج ٹاکرا ہوگا۔

کولکتہ کے ایڈن گارڈن اسٹیڈیم میں دونوں ٹیمیں پاکستانی وقت کے مطابق سہہ پہر ڈھائی بجے آمنے سامنے ہوں گی۔ قومی ٹیم کے کپتان شاہد آفریدی کا کہنا ہے کہ ٹی ٹوئنٹی ورلڈ کپ کا آغاز فتح سے کرنا چاہتے ہیں جس کے لئے ہر کھلاڑی کو پرفارم کرنا ہوگا۔

گرین شرٹس کے پاس اسکواڈ میں فاسٹ بولر محمدعامر، طویل القامت محمد عرفان، فاسٹ اور میڈیم کے مرکب انور علی، برق رفتار وہاب ریاض اور محمد سمیع موجود ہیں جب کہ اسپن کے شعبے میں عماد وسیم، کپتان شاہد آفریدی، محمد نواز اور شعیب ملک کی خدمات میسر ہیں اور بیٹنگ کے شعبے میں بھی باصلاحیت احمد شہزاد، محمد حفیظ، شرجیل خان، عمراکمل، سرفراز احمد اور خالد لطیف شامل ہیں۔

سری لنکا کی جانب سے انجیلو میتھیوز ٹیم کی قیادت کریں گے جب کہ 15 رکنی اسکواڈ میں تلکرانے دلشان، دشمنتا چمیرا، دنیش چندیمل، سرنگا لکمل، تھسارا پریرا،سچترا سینانایاکے،داسون شاناکا،ملندا سری وردانہ،لہیرو تھرمانے،رنگانا ہیرات،شیان جے سوریا، چامارا کپوگیدرا اور نوائن کلاسیکرا شامل ہیں۔






Comments are Closed